Pjetër Marku, babai i Jozit, ka folur së fundmi për rrugëtimin
e djalit të tij në “Big Brother VIP 4”, duke dhënë mendimin e tij për lojën, debatet dhe marrëdhënien me Loredanën.
Në fillim, ai pranoi se strategjia e parë e Jozit në shtëpi ishte e ashpër dhe e gabuar, por me rikthimin e tij, ai ka treguar versionin e tij të vërtetë.
Gjithashtu, Marku komentoi edhe përplasjet e Jozit me Rozanën dhe Gjestin, duke mos u ndalur në detaje, por duke lënë të kuptohet se i ka ndjekur me vëmendje.
Një nga temat më të diskutuara ka qenë marrëdhënia mes Jozit dhe Loredanës, për të cilën babai i tij u shpreh i hapur:
“Nuk jemi aspak kundër që ata të njihen jashtë. Përsa i përket Loredanës, ne mbështesim zgjedhjet e djalit tonë, por duam që ai të luajë lojën e tij. Do të doja të shikoja Jozin si lojtar dhe flirtet ndodhin në varësi të situatave brenda në shtëpi. Ata kanë ndjenja për njëri-tjetrin dhe ne s’jemi aspak kundër që të njihen jashtë.”
Duke iu referuar shqetësimeve të prindërve të Loredanës mbi këtë marrëdhënie, Marku shtoi:
“Ne i mirëkuptojmë për shqetësimet e tyre të mëparshme. Di të them që Jozi na ka bërë krenarë. Këshilla ime për të ka qenë ta shijojë ‘Big Brother’, pavarësisht se si interpretohen gjërat.”
Me këtë deklaratë, babai i Jozit lë të kuptohet se ai dhe familja e tij e mbështesin rrugëtimin e tij, ndërsa mbetet për t’u parë si do të zhvillohet marrëdhënia mes tij dhe Loredanës brenda dhe jashtë shtëpisë së “Big Brother VIP”.
